Ný stjórn Ungheilla og kraftmikil framtíðarsýn

Aðalfundur Ungheilla, ungmennaráðs Barnaheilla,  var haldinn miðvikudaginn 29. október þar sem farið var yfir starf síðasta árs og rætt um framtíð ráðsins. Á fundinum var lögð áhersla á mikilvægi þess að raddir ungs fólks heyrist í samfélaginu og að það  sé virkir þátttakendur í ákvarðanatöku um málefni sem snúa að börnum og ungmennum.

„Það skiptir máli að vanda til verka og hafa ungt fólk með í samtalinu,“ var meðal þess sem kom fram í umræðum á fundinum.

Ný stjórn Ungheilla var kosin og bjóðum við fjóra nýja stjórnarmeðlimi hjartanlega velkomna:

• Mia Ðuric
• Ástrós Inga Jónsdóttir
• Sóley Lóa Smáradóttir
• Karítas Lea Kristjánsdóttir

Þær koma með frábæra orku og ferskar hugmyndir inn í starfið. Indriði Nökkvi Þóreyjarson og Alex Lilja Rún halda áfram í stjórn og munu styðja við áframhaldandi uppbyggingu Ungheilla.

Framtíðarsýn Ungheilla er skýr: að skapa vettvang þar sem ungt fólk getur haft áhrif, tekið þátt í mótun samfélagsins og tryggt að málefni barna og ungmenna séu ávallt í forgrunni.

Á sama tíma og Barnaheill hlakka til samstarfsins með nýju stjórn Ungheilla þá þökkum við fráfarandi stjórn fyrir framlag sitt. Þeirra framlag hefur lagt grunn að áframhaldandi árangri og nýjum tækifærum.