Barnaheill – Save the Children á Íslandi hafa veitt þróunar- og neyðaraðstoð í rúmlega tvo áratugi.
Barnaheill – Save the Children á Íslandi eru hluti af alþjóðasamtökunum Save the Children sem eru stærstu alþjóðlegu frjálsu félagasamtök sem starfa í þágu barna í heiminum. Alþjóðasamtökin voru stofnuð árið 1919 og vinna nú að verkefnum í um 120 löndum. Á síðustu rúmlega 100 árum hafa alþjóðasamtök Barnaheilla – Save the Children breytt lífi yfir 1 milljarðs barna.
Alþjóðastarf Barnaheilla skiptist annars vegar í þróunaraðstoð og hins vegar mannúðaraðstoð. Mannúðaraðstoð Barnaheilla snýst að mestu leyti að viðbrögðum við neyð í kjölfar náttúruhamfara eða hamfara af mannavöldum. Með þróunaraðstoð veita Barnaheill aðstoð til fátækustu ríkja heims þar sem er lögð áhersla á almenna velferð á grundvelli mannréttinda.
Barnaheill – Save the Children á Íslandi vinna náið með alþjóðasamtökunum Barnaheilla – Save the Children um mótun stefnu og starfshátta. Einnig vinna Barnaheill náið með staðbundnum skrifstofum í þeim löndum sem samtökin veita aðstoð í.
Hér að neðan má lesa nánar um þau alþjóðlegu verkefni sem Barnaheill – Save the Children á Íslandi starfa að í dag. Barnaheill eru með þróunaraðstoð í Síerra Leóne, Líberíu og Lýðstjórnarlýðveldinu Kongó og neyðaraðstoð í Lýðstjórnarlýðveldinu Kongó, Írak og Madagaskar. Einnig veita Barnaheill fjármagn til Viðbragðssjóðs alþjóðasamtaka Barnaheilla – Save the Children.
