Metþátttaka í ungmennaþingi Barnaheilla í Hafnarfirði og Garðabæ

Rúmlega 80 ungmenni tóku þátt í öðru ungmennaþingi Barnaheilla um ofbeldi í nánum samböndum, en það var haldið í Skátaheimilinu í Hafnarfirði þann 4. mars. Þátttakendur voru úr efstu bekkjum Garðaskóla í Garðabæ, og Lækjarskóla, Setbergsskóla, Víðistaðaskóla, Öldutúnsskóla og Áslandsskóla í Hafnarfirði, ásamt nemendum úr Fjölbrautaskóla Garðabæjar og Flensborg.

,,Ungmennin sem mættu  úr skólunum í Hafnarfirði og Garðabæ voru hreint út sagt stórkostleg. Það var virkilega gagnlegt að heyra þeirra sýn á þetta mikilvæga málefni,“ sagði Kolbrún Hrund Sigurgeirsdóttir verkefnastýra ofbeldisforvarna og kynheilbrigðismála hjá Barnaheillum. „Mér fannst áberandi hversu virk þau voru í hópavinnunni. Það var líka gaman hversu mörg þeirra töluðu um að þau hefðu lært mikið af því að eiga þetta samtal og hversu skemmtilegt þeim fannst að taka þátt í þinginu.“ 

Þátttakendum var skipt niður á átta borð með mismunandi umræðuefni sem sneri að ofbeldi í nánum samböndum unglinga. Starfsfólk sem vinnur að ungmennastarfi í skólunum tók að sér að stýra borðumræðum um viðfangsefnin.

Hóparnir færðu sig svo reglulega á milli borða til að ræða málefnið út frá ýmsum hliðum og læra að þekkja muninn á heilbrigðum og óheilbrigðum samskiptum, þekkja birtingamyndir ofbeldis, hvert bæði þolendur og gerendur geta leitað eftir aðstoð, hvaða úrræði eru í boði, við hverja er best að tala, og eins um mikilvægi fræðslu og forvarna eins og Barnaheill standa að.

Ungmennin voru sér og sínum skólum til mikils sóma og tóku virkan þátt í samtalinu. Þau kölluðu eftir meiri fræðslu og töldu að stjórnvöld ættu að gera meira í því að auka umræðu og efla forvarnir í þessum málaflokki. Ungmennaþinginu lauk svo um hádegi með veislu þar sem boðið var upp á pizzur, og allir fengu kveðjugjöf frá Barnaheillum í þakklætisskyni fyrir þátttökuna.

Barnaheill fengu styrk frá dómsmálaráðuneyti til að halda ungmennaþing á sex stöðum víðs vegar um land. Fyrsta þingið var á Suðurnesjum í febrúar,  annað nú í Hafnarfirði og Garðabæ og næsta þing verður haldið strax á morgun 5. mars á Akureyri. Fjórða í röðinni verður Ísafjörður 16. mars, svo 24. mars á Egilsstöðum, og lokst 26. mars á Selfossi.

Niðurstöður af þingunum verða sendar til þátttakenda, skólayfirvalda, lögreglu og sveitarstjórnarfólks á vordögum, og verða nýttar til að byggja upp betra forvarnastarf og viðbrögð við ofbeldi í nánum samböndum ungmenna. Þá verða niðurstöðurnar kynntar á sérstöku málþingi Barnaheilla sem haldið verður 29. apríl.