Barnaheill halda úti verkefnum sem snúa að markvissum forvörnum gegn einelti og kynferðisofbeldi og bjóða upp á námskeið og fyrirlestra þar sem hægt er að öðlast þekkingu og fræðslu og bæta verklag í forvörnum gegn ofbeldi á börnum.
Við teljum að fræðsla og upplýst umræða sé besta forvörnin og stuðli að því að við sem samfélag verðum betur í stakk búin til að takast á við og koma í veg fyrir óæskilega hegðun. Kynferðisofbeldi gagnvart börnum er alvarlegt, alþjóðlegt vandamál og eru vitundarvakning, fræðsla og forvarnir afar mikilvæg tæki í baráttunni gegn því. Börn bera aldrei ábyrgð á því ofbeldi sem þau verða fyrir eða horfa upp á og það á aldrei að líðast.
Heillabraut
Heillabraut er forvarnarverkefni gegn kynferðisofbeldi á börnum og ungmennum. Markmið Heillabrautar er að fækka kynferðisbrotum með fræðslu og stuðningi við börn og ungmenni, foreldra og fagfólk sem starfar með þessum hópi.
VINÁTTA
Vinátta er forvarnarverkefni gegn einelti ætlað leikskólum, 1.–4. bekk grunnskóla, frístundaheimilum og dagforeldrum. Verkefnið felst í útgáfu námsefnis sem ætlað er börnum, foreldrum þeirra og starfsfólki sem og námskeiðum fyrir starfsfólk.